२०८३ जेठ १९ गते
शेयरबजारमा दोहोरो अङ्कको गिरावट, कारोबार रकममा भने वृद्धि
२०८१ मंसिर ०६ गते
काठमाडौँ। साताको अन्तिम कारोबार दिन नेप्से परिसूचकमा दोहोरो अङ्कको गिरावट आएको छ । बिहिबार नेप्से परिसूचक ३१.३१ विन्दुले घटेर २६८०.४४ अंकमा आएको छ । बजार खुलेदेखिनै विभिन्न उतार चढाव बेहोरेको नेप्से अन्ततः १.१५ प्रतिशतले घटेको हो ।
यस दिन नेप्सेका १३ उपसमूहमध्य १३ उपसमूहकै परिसूचक घटेको छ । यस दिन सर्वाधिक घट्ने उपसमूहमा फाइनान्स उपसमूह रह्यो जसको परिसूचक २.८६ प्रतिशतले घटेको छ । त्यस्तै होटल तथा पर्यटन उपसमूह १.७३ प्रतिशत, अन्य उपसमूह १.६७ प्रतिशत, उत्पादन प्रशोधन उपसमूह १.५४ प्रतिशत, विकास बैंक १.४७ प्रतिशत, त्यस्तै लाइफ इन्स्योरेन्स १.३६ प्रतिशतले घटेका छन् । आज सबै भन्दा कम घट्ने उपसमूहमा म्युचुवल फन्ड रह्यो जसको परिसूचक ०.१९ प्रतिशतले घटेको छ।
नेप्से परिसूचक दोहोरो अंकले घटेसंगै बिहिबार कारोबार रकम भने बढेको छ । अघिल्लो कारोबार दिन ७ अर्ब ९ करोडको शेयर खरिदबिक्री भएको बजारमा यस दिन ३१४ स्टकको एक लाख ८४ हजार पटकको कारोबारमा ८ अर्ब २५ करोड बराबरको किनबेच भएको छ । जसमा ४३ कम्पनीका शेयर बढेका छन् भने १९७ कम्पनीका शेयर घटेका छन् । त्यस्तै, चार कम्पनीको शेयर भने स्थिर रहेका छन् ।
यस दिन सर्वाधिक बढ्नेमा सामुदायिक लघुवित्त, थ्री स्टार हाइड्रोपावर रह्यो जसको शेयर सर्किट लेभलमा कारोबार भएको छ। त्यसै गरी सर्वाधिक घट्नेमा जानकी फाइनान्स रह्यो जसको शेयरमा नकारात्मक सर्किट लागेको छ ।
कारोबार रकमका आधारमा सर्वाधिक कारोबार हुनेमा नेपाल फाइनान्स रह्यो जसको २५ करोड २४ लाख शेयर कारोबार भएको छ । त्यस्तै, बिहिबार भोल्युमको आधारमा सर्वाधिक कारोबार हुनेमा सिटिजन म्युचुवल फन्ड-१ रह्यो जसको ११ लाख ९८ हजार कित्ता शेयर किनबेच भएको छ।
प्रतिक्रिया